ميدو يفتح النار: الفساد دمر الكرة المصرية
شن أحمد حسام ميدو، عضو لجنة التخطيط بنادي الزمالك المصري، هجومًا شرسًا على مسئولي الكرة المصرية، مشددًا على وجود فساد ومجاملات وهو ما أدى إلى منتخبات ضعيفة في مختلف الفئات السنية ودوري فاشل بحسب وصفه. وكتب ميدو عبر حسابه الرسمي على منصة "إكس": "نظام إدارة كرة القدم في مصر عين عيال في مناصب مهمة غير مؤهلين علشان تعرف تتحكم فيهم وفي قراراتهم علشان تعرف تجامل اللي أنت عايزه". وأضاف: "والنتيجة دوري فاشل ومن سئ إلى أسوأ ومنتخبات ضعيفة مافيهاش ولا لاعيب هيكمل ويلعب منتخب أول ومدربين مالهومش أي علاقة بعلم التدريب الحديث". وواصل: "وجمهور معظمه مشحون في أتوبيسات تبع أحزاب سياسية وإعلاميين بيطبلوا لبعض اللاعبين بعينهم علشان ولاد ناس مهمين، وكورة بصراحة سيئة مالهاش أي علاقة بالكورة اللي بنتفرج عليها في كل حتة في العالم". وتابع نجم الزمالك ومنتخب مصر السابق: "أحلى حاجة إن بعض الإعلاميين والمسؤولين بيعتبوا على الجمهور ليه مابيروحوش ماتشات المنتخبات، فاكرين الجمهور عبيط ومش دريان بكم الفساد والمجاملات اللي موجود في الكورة في مصر". واختتم: "اللي أنتوا ماتعرفهوش إن عندنا جيل جديد بالكامل غير مهتم بمتابعة الدوري المصري من الأساس ومابيتفرجش عليه ولا مهتم بأخباره ولا يعرف أسامي اللاعيبة اللي بتلعب في المنتخب من الاساس إلا اتنين أو ثلاث لاعيبه".
