كريم عبدالحق: الزمالك ظلمني ودمّر مستقبلي بالكامل!

فجّر كريم عبدالحق، لاعب الزمالك المصري السابق، مفاجآت مدوية بشأن مسيرته داخل النادي الأبيض، كاشفًا عن معاناته في بداية مشواره، وتفاصيل الأزمة التي انتهت برحيله عن الفريق بطريقة وصفها بـ"الظالمة". وقال عبدالحق، خلال ظهوره في برنامج على قناة "النهار": "كنت مع الفريق الأول ومفيش حد عمل لي عقد.. كنت باخد 800 جنيه ومكنتش باخدهم كمان! وفيه أبناء لاعيبة بيتمضي لهم عقود وأنا مش عايز أتكلم". وأوضح اللاعب أنه انتقل إلى نادي سيراميكا بعد تجاهله في الزمالك، قبل أن يتلقى اتصالًا من مدير الكرة عبدالواحد السيد يطلب فيه عودته: "كابتن عبدالواحد قالي إحنا محتاجينك عشان القيد، ورجعت فعلاً، لكني ما لعبتش، ورفضوا كمان يشوفوا عروض الإعارة اللي جات لي". وتابع عبدالحق: "قبل ما القيد يقفل بيومين، قالي الإدارة بلغتني إنك هتمشي. قولتله كده إنت هتخلص عليا". وأشار إلى أن النادي حاول إجباره على التنازل عن مستحقاته: "عملوا لي عقد إعارة للترسانة وكتبوا فيه إني اتنازلت عن فلوسي كلها، والمسؤولين في الترسانة قالولي خد بالك هما عملوا العقد ده عشان متاخدش فلوسك، اللي هي 2 مليون و600 ألف، ورفضت أوقع". وأضاف: "عبدالواحد قالي هتاخد 400 ألف جنيه بس ومتحلمش بأكتر، وقالي لو راجل اشتكي النادي. بصراحة، عبدالواحد السيد دمّرلي مستقبلي". وتأتي تصريحات كريم عبدالحق لتفتح الباب مجددًا حول ملف التعامل مع لاعبي قطاع الناشئين في الزمالك، وسط انتقادات متكررة لسياسات التعاقدات والإعارات، وطريقة إدارة ملف المواهب الشابة.